शिंदे गटाच्या ‘शासन आपल्या दारी’ कार्यक्रमाला फडणवीसांची दांडी
_मोदी शिंदेची जाहिरात, तर फडणवीसांची वरात_
कोल्हापूर: ‘शासन आपल्या दारी’ या कार्यक्रमासाठी राज्याचे मुख्यमंत्री एकनाथ शिंदे काल कोल्हापूर दौऱ्यावर होते. काल राज्यभर जाहिरातीच्या चर्चेला उधाण आले होते. ही शिंदेची स्टंटबाजी तर फडणवीसांचा अपमान असल्याच्या गल्ली ते दिल्लीपर्यंत प्रतिक्रीया उमटल्या. जाहिरातीत फडणवीसांचे नाव नसल्याने त्यांना हा अपमान सहन न झाल्याने उपमुख्यमंत्री देवेंद्र फडणवीस यांनी शिंदे गटाच्या ‘शासन आपल्या दारी’ या कार्यक्रमाला दांडी मारली. खरे पाहता हा शासनाचा कार्यक्रम नसून तो फक्त शिंदे गटाचा असल्याच्या चर्चाही राजकीय क्षेत्रात दिसून येत आहे.
काल मुख्यमंत्री शिंदेंच्या कार्यक्रमासाठी निघालेल्या ठाकरे गटाच्या कार्यकर्त्यांना पोलिसांनी ताब्यात घेतलं.त्यावर या प्रकरणावर ठाकरे गटाचे नेते संजय पवार यांनी प्रतिक्रिया दिली आहे. “शिवसैनिकांना ताब्यात घेणं हा दडपशाहीचा प्रकार आहे. मुख्यमंत्री कोणत्याही एका पक्षाचे नसतात.
लोकशाहीला घातक असलेली ही पद्धत महाराष्ट्रात सुरू आहे. कालची सभा अयशस्वी झाली. हा एक इव्हेंट होता. पैसे शासनाचे आणि इव्हेंट यांच्या पक्षाचा होता. ज्या पद्धतीने यात पैसे खर्च केले गेले त्या प्रमाणात मात्र लोकं आले नाहीत. जे काही लोकं आले ते प्रशासनाच्या प्रयत्नामुळे. प्रशासनावर लोक आणण्यासाठी दबाव असल्यामुळे लोकांना फसवून व दमदाटी करून जबरीने गाडीत भरून सभेच्या ठिकाणी आणले गेले”, असं संजय पवार म्हणाले.
शिवसेनेच्या जाहिरतीवरही संजय पवार यांनी प्रतिक्रिया देताना ते म्हणाले की,”केंद्रातलं आणि राज्यातलं सरकार जाहिरातीवरच सुरू आहे. एकमेकाला चेकमेट देण्यासाठी या जाहिराती सुरू आहेत. या जाहिरातीचा स्फोट लवकरच महाराष्ट्रात होणार आहे. जाहिरातीत शिवसेनाप्रमुखांचा फोटो असायलाच पाहिजे होता. त्या गोष्टीचा इतक्या लवकर विसर कसा पडला? तुमच्या किती जाहिराती झाल्या तरी महाराष्ट्राची जनता तुम्हाला धडा शिकवणारच आहे”.असे सडेतोड वक्तव्य संजय पवार यांनी केले.
