राहुल गांधी आणि सोनिया गांधींना ईडीचे समन्स
_८ जून रोजी चौकशीसाठी हजर राहण्याचे आदेश_
काँग्रेसच्या हंगामी अध्यक्षा सोनिया गांधी आणि काँग्रेस नेते राहुल गांधींना ईडीने समन्स पाठवले आहे. नॅशनल हेराल्ड प्रकरणी ईडीने सोनिया आणि राहुल गांधींना समन्स पाठवले असून, ८ जून रोजी चौकशीसाठी हजर राहण्यास सांगितले आहे.
नॅशनल हेराल्ड प्रकरणी ईडीच्या समन्समुळे पुन्हा राहुल गांधी आणि सोनिया गांधी यांच्या अडचणीत वाढ झाली आहे. २०१५ मध्ये तपास यंत्रणेने हे प्रकरण बंद केले होते. मात्र आता ईडीनं गांधी मायलेकांना समन्स पाठवलं आहे. काँग्रेस नेते अभिषेक मनू सिंघवी आणि रणदीप सुरजेवाला यांनी पत्रकार परिषद घेऊन हा दावा केला आहे. अभिषेक मनु सिंघवी यांनी सांगितले की, सोनिया गांधी यांना ईडीने ८ जून रोजी चौकशीसाठी बोलावले आहे. सध्या राहुल गांधी परदेशात आहेत.
या प्रकरणी भारतीय जनता पार्टीचे नेते आणि आमदार अतुल भातखळकर यांनी प्रतिक्रिया दिली आहे. ते म्हणाले, हेराल्ड प्रकरणी राहुल आणि सोनिया गांधी हे जामिनावर बाहेर आहेत. कायद्यासमोर गांधी किंवा इतर कोणीही मोठे नाही. देशाचे पंतप्रधान नरेंद्र मोदी यांची सीबीआयने ९ तास चौकशी केली होती. त्यामुळे कायद्यासमोर सगळे सारखे आहेत. काँग्रेसला जर वाटतं असेल अन्याय होत आहे तर हेराल्ड प्रकरणी एफआयआर आहे तो बघावा. कायदा सगळ्यांना सारखाच असल्याचे भातखळकर म्हणाले आहेत.
