वनविभागाच्या जागेतील मुरम गेलाय चोरीला…!!
_काल तर इथंच होता, आज मुरूम गायब_
✍️खेमराज गि-हेपुंजे/बिनधास्त
भंडारा: जिल्ह्यातील लाखनी तालुक्यातील परिसरात वाळूचोरी ही नित्याची बाब झाली असतांना, आता भुरट्या चोरट्यांनी आपला मोर्चा मुरूम चोरीकडे वळविला आहे . कवडसी गावाच्या हद्दीतील वनविभागाच्या जागेतून खुलेआम मुरमाचा उपसा करून अवैध वाहतूक करण्यात येत आहे. नित्यनेमाने ये जा करणा-यांना प्रश्न पडलाय की, ‘मुरूम चोरीला गेला कसा, काल तर इथच होता.’ त्यामुळे महसूल विभागाकडून पाहणी करून पंचनामा करण्यात आला आहे . कवडसी गावाच्या शेजारी असलेल्या भूमापन क्रमांक १०२ या शासकीय जागेतून ४२४ ब्रास मुरूम उपसा करण्यात आला आहे .
ही जागा कुरणाची असून येथे पाळीव जनावरे चाराईसाठी जातात . मात्र , खोदकामामुळे झालेल्या मोठमोठ्या खड्यांमुळे जनावरे त्यात पडण्याची भीती निर्माण झाली आहे . परिसरात गौण खनिज चोरी प्रकरणामध्ये वाढ झाली आहे . या संबंधी महसूल विभागाने अधिक लक्ष देणे गरजेचे झाले आहे . रस्ता रुंदीकरणाच्या कामात वापर शासकीय जागेतून काढलेला मुरूम जवळ सुरू असलेल्या मचारणा ते निमगाव मार्गाच्या बांधकामात वापरले जात असल्याचे ग्रामस्थांचे म्हणणे होते त्या आधारावर पाहणी करूत तलाठी एम . जे कासराडे यांनी याचा पंचनाम्यात उल्लेख केला आहे त्यामुळे संबंधित कंत्राटदाराने रस्त्याच्या कामात अवैध मुरूम वापरला हे स्पष्ट झाले आहे . संबंधित कंत्रादारांवर कारवाई करावी अशी मागणी नागरिक व पशुपालकांनी केली आहे.
” ग्रामस्थांकडून मिळालेल्या माहितीच्या आधारे मौका पाहणी केली . यामध्ये शासकीय जागेत मुरूम उत्खनन केले असून त्याचा अवैध्यरित्या रस्त्याच्या कामात वापर केल्याचे दिसून आले . हा पाहणी अहवाल तहसीलदारांना पाठविला आहे.
*एम जी कासराडे , तलाठी कवलेवाडा*
