नुपूर शर्माला मुंबई पोलीसांचे ‘समन्स’
_नुपूर शर्माला मिळाला विश्व हिंदू परिषदेचा पाठिंबा_
मुंबई: भारतीय जनता पार्टीच्या निलंबित नेत्या व राष्ट्रीय प्रवक्त्या नुपूर शर्मा यांना आता मुंबई पोलिसांनी समन्स बजावले आहे. मोहम्मद पैगंबर यांच्यावर केलेल्या टिप्पणीप्रकरणी ही कारवाई करण्यात आली आहे. तिला 22 जूनपर्यंत हजर राहावे लागणार आहे. पक्षाने कारवाई केल्यानंतर नुपूरने आपले वादग्रस्त विधान मागे घेतले होते. भगवान शंकराची सतत विटंबना आणि अपमान होताना पाहून आपण अशी प्रतिक्रिया दिल्याचा दावा तिने केला होता. तिच्या वक्तव्यामुळे कोणाच्याही धार्मिक भावना दुखावल्या गेल्या असतील, तर मी माफी मागते, असे नुपूरने स्पष्टपणे सांगितले होते.
*नुपूर शर्माला मिळाला विश्व हिंदू परिषदेचा पाठिंबा*
दुसरीकडे नुपूर शर्माला विश्व हिंदू परिषदेचा (विहिंप) पाठिंबा मिळाला आहे. विश्व हिंदू परिषदेचे आंतरराष्ट्रीय कार्याध्यक्ष आलोक कुमार यांनी सांगितले की, नुपूर शर्मा यांचे विधान खरे की खोटे हे न्यायालय ठरवेल. VHP नेत्याने न्यायालयाच्या निर्णयाची वाट न पाहता नुपूरच्या वक्तव्यावर झालेल्या हिंसक निषेधाबद्दल चिंता व्यक्त केली आणि काही लोक कायदा हातात घेत असल्याचे सांगितले.
आलोक कुमार म्हणाले की, न्यायालयाच्या निर्णयाची वाट न पाहता देशभरात हिंसक आंदोलने होत आहेत, हे कायद्यानुसार होत आहे का? पैगंबराबद्दल कोणी काही बोलले, तर जीभ कापली जाईल, असे उघडपणे बोलले जात आहे. नुपूरच्या टिप्पण्यांविरुद्ध तक्रारींच्या आधारे पोलिस एफआयआर नोंदवतील आणि त्याची चौकशी करतील, असे ते म्हणाले. त्यानंतर कोर्ट त्यावर सुनावणी करेल आणि शेवटी लोकांनी कोर्टाचा निर्णय स्वीकारावा.
*वाढवली नुपूर शर्माची सुरक्षा*
वादग्रस्त वक्तव्य केल्याच्या आरोपावरून भारतीय जनता पक्षातून निलंबित करण्यात आलेल्या प्रवक्त्या नुपूर शर्मा आणि त्यांच्या कुटुंबीयांना दिल्ली पोलिसांनी सुरक्षा पुरवली आहे. या टिप्पणीमुळे नुपूरला जीवे मारण्याच्या धमक्या येत होत्या, त्याविरोधात तिने पोलीस ठाण्यात तक्रार केली आणि सुरक्षेची विनंती केली. या एफआयआरच्या आधारे पोलिसांनी तिला आणि तिच्या कुटुंबाला सुरक्षा पुरवली आहे.
