🇮🇳हिंदुस्थान वा इंडिया गर्जा जिंदाबाद अंतरंगातून….!🇮🇳

🇮🇳हिंदुस्थान वा इंडिया गर्जा जिंदाबाद अंतरंगातून….!🇮🇳

सौ.वैशाली उत्तम अंड्रस्कर, चंद्रपूर

शनिवारीय काव्यस्तंभ स्पर्धेच्या निमित्ताने ‘इंडिया’ जिंदाबाद विषय माननीय मुख्य प्रशासक राहुल पाटील यांनी दिला आणि या भारत वर्षाला किती आणि कसे नामाभिधान लाभत गेले याचे औत्सुक्य मनी दाटून आले.

भरत घराण्यातील पराक्रमी राजाच्या नावापासून तर सिंधू संस्कृतीच्या अपभ्रंशातून निर्माण झालेल्या हिंदुस्थानापर्यंत…तर कधी ब्रिटिशकालीन गुलामगिरीचे प्रतीक म्हणून उपहासाने चर्चिला जाणारा ‘इंडिया’. कितीही आणि कोणतीही नावे असू द्यात…पण ही आपली मातृभूमी आहे….जिच्या मातीत आपण वाढतो बागडतो…जी सकस अन्नधान्याने आपल्याला पोसते… जिच्या अंगाखांद्यावर खेळणाऱ्या नद्या-सागरांनी आपले जीवन समृद्ध केले…ज्या भूमीवर पडणाऱ्या सूर्यकिरणांनी आपल्याला प्रकाशित केले आणि अखेर या मातीच्या कुशीतच आपले विसावणे आहे…ती कायम आपल्याला वंदनीय आहे.

अनेक जाती, धर्म, प्रांत, भाषा, पेहराव, खाद्यसंस्कृती यांची अलौकिक सरमिसळ म्हणजे भारत…आपल्याबरोबरच इतर संस्कृतीचा आदर करणारी…सर्वांना सामावून घेणारी…कलागुणांना वाव देणारी…अशी ही भारतीय संस्कृती आणि आपली भूत , वर्तमान आणि भविष्यातील पिढी या सर्वांच्याच योगदानाने भारताची आन बान आणि शान वाढत आहे. मात्र गरीब श्रीमंत दरी… समाजभान हरवलेले नेतृत्व…अशा गर्तेत हरवलेला भारतदेश इंडिया होऊन परका भासायला लागतो. हा इंडिया आपला नाहीच तो फक्त काही मोजक्या लोकांचा आहे…हा मनात रूजत चाललेला गैरसमज देशाच्या विकासातील मोठी खिळ ठरत आहे.

सर्व क्षेत्रात सर्वच गुणवत्ताधारी आपापले कर्तव्य चोख बजावतात पण उडदामाजी काळे गोरे असणारच म्हणून निराशेचा पडदा डोळ्यांवर बसवून रात्रीचा अंधार सोसण्याऐवजी समता, बंधुता आणि एकता या त्रिसूत्रीने प्रकाशाची आस धरू या…मग भारत माता की जय किंवा ‘इंडिया जिंदाबाद’ म्हटल्याने काहीच फरक पडत नाही…!

सध्या स्वातंत्र्याच्या अमृतमहोत्सवानिमित्त वेगवेगळ्या उपक्रमांची रेलचेल आहे. हा लोकोत्सव आहे. हर घर तिरंगा उपक्रमानिमित्ताने…तिरंग्याचा स्पर्श…त्यातील रंग, अशोकचक्र…यांना नजरेत सामावून घेता येत आहे. उपक्रम कुठल्याही एखाद्या समविचारी अथवा विरोधी संस्था, संघटनेचा असो…पण भारत..इंडिया तर आपणा सर्वांचा आहे…या मातृभूमीचे आपल्यावर अनंत उपकार आहेत…आणि म्हणूनच म्हणावेसे वाटते…

मातृभूमीचे न कधी फिटता फिटे ऋण…भारत… हिंदुस्थान वा इंडिया गर्जा जिंदाबाद अंतरंगातून….!

सर्व शिलेदारांनी ‘इंडिया जिंदाबाद’ अगदी मनापासून गर्जले अर्थात लेखणीतून साकार केले. सर्वांचेच खूप खूप अभिनंदन आणि भावी वाटचालीस भरभरून शुभेच्छा… अमृतमहोत्सवी स्वातंत्र्यदिनाच्या सर्वांना हार्दिक शुभेच्छा…!

🇮🇳जयहिंद…जय भारत…!🇮🇳

✍️सौ.वैशाली उत्तम अंड्रस्कर, चंद्रपूर
कवयित्री/लेखिका
सहप्रशासक/मुख्य परीक्षक/संकलक