रागिणी
त्रास देणे मानवाला,मानवाचा छंद हा
घे शिकूनी फुलांतुनी, देणे रंग आणि गंध हा !
तुटल्या नात्यांना,मी पुन्हा गाठ एक बांधिली
आवळू किती गाठीला,पाठ माझी मोडली !
स्त्री मुक्तीची दास्ता रचती,काही राजकारणी कावळे
कोण थांबविणार तिच्या,अंतरातील वादळे !
वेदना ही ,स्त्री जन्माची संपणार नाही कधीही
रागिणी पाण्यात घेते,लेकरांसहित रोजच उडी !
पाळण्याचा दोर हाती,पुरुषांनीही घ्यावा जरा
स्त्रीलाही शिकू द्या ना,जगण्याच्या विविध तऱ्हा !
त्रास देणे मानवाला ,मानवाचा छंद हा
घे शिकूनी फुलांतुनी,देणे रंग आणि गंध हा…!
सीमा वैद्य
वरोरा, जि. चंद्रपूर
=========
