चंद्रपूर वनपरिक्षेत्रात आढळला ‘शर्मिली’ वाघीणीचा मृतदेह
पायली-भटाळी गावाजवळ काल आढळला मृतदेह
चंद्रपूर : जिल्हा वनपरिक्षेत्रांतर्गत पायली-भटाळी गावाजवळ काल मंगळवारी सायंकाळी एका वृद्ध वाघिणीचा मृतदेह आढळून आला. मृत वाघिणी ही ताडोबा अंधारी व्याघ्र प्रकल्पातील बफर झोनमधील लोकप्रिय शर्मिली असल्याचा संशय वनपालांनी व्यक्त केला आहे.
चंद्रपूर परिक्षेत्रातील वनपाल गेल्या काही दिवसांपासून पायली- भटाळी गावांजवळ मादी वाघिणीच्या हालचालींवर लक्ष ठेवून होते.
काल मंगळवारी संध्याकाळी गावाजवळील कंपार्टमेंट क्रमांक ८८१ मध्ये पाळत ठेवून असलेल्या पथकाला वाघिणीचा मृतदेह आढळून आला. वनाधिकारी राहुल कारेकर यांना माहिती होताच त्यांनी घटनास्थळी भेट दिली.
चंद्रपूरमधील ट्रान्झिट ट्रीटमेंट सेंटरकडे (टीटीसी) चौकशीच्या प्रक्रियेनंतर मृत वाघिणीचे सर्व अवयव शाबूत असल्याचा दावा करून घातपाताची शक्यता नाकारण्यात आली आहे. वृद्धापकाळामुळे तिचा मृत्यू झाल्याचे सांगितले जात आहे.
