आम्रवृक्ष
काळ्याभोर वावरात
उभा स्तब्ध आम्रवृक्ष
कडू गोड आठवणी
देत असे सदा साक्ष.
काळ्या शेत बांधावर
आला आंब्याला मोहर
त्याच्या धुंद सुवासाने
हर्ष विभोर भ्रमर.
काळ्याभोर वावरात
अशी दाट छाया पडे
थकलेल्या पांथस्थाला
खाली झोपणे आवडे.
वावरात बांधावरी
लिंब बाभळी संगत
अंगाखांद्यावरी पक्षी
पहा बसली पंगत.
जीर्ण झाल्या फांद्या जरी
अजुनही खुणावतो
कसे उन्हात जगावे
साऱ्या जगाला सांगतो.
दिपककुमार सरदार
ता. लोणार जि. बुलढाणा
==========