भेद मिटवू
भेद मिटवू चला सारे
नकोत कलह हेवेदावे
प्रेमाचे घालूनी बंधन
मतभेद दूर व्हावे ||१||
ऋणानुबंध जपूया आपले
आता मनमनांतून आपण
सहृदय देऊया चला आता
एकमेकांस अलिंगन ||२||
भेदाची भिंत उभी करावी
कशास आपल्याच भोवती
आपणच जर आहोत
एकमेकांचे नित्य सोबती ||३||
गैरसमज करील विनाश
आपल्यातील नात्यांचा
भेद मिटवू चला तर मग
विजय होईल सत्याचा ||४||
मतभेद नको,नको असूया
नकोच वृथा अभिमान
भावनांचा आदर करू चला
राखू परस्परांचा मान ||५||
भेद मिटवू आपापसातील
चला सारे येऊया एकत्र
गळाभेट ही सार्थ करील
आपल्यातील अतूट मैत्र ||६||
पांडुरंग एकनाथ घोलप
ता.कर्जत जि.रायगड
