‘ईटुकल्या पिटुकल्यांचे नाटकबिटक’; सुट्टीतल्या अभिनय शिबीरांची धमाल
अमृता खाकुर्डीकर, प्रतिनिधी पुणे
पुणे: उन्हाळी सुटी आणि बाल रंगभूमी याचे अनोखे नाते आहे. सुट्टीत बालनाट्य शिबीरे घेणारी काही नाटकमंडळी वर्षानुवर्ष हे काम निष्ठेने करीत आहेत. मुंबईच्या “माता अनुसूया प्राॅडक्शन” या संस्थेच्या वतीने यंदा पुणे शहराच्या सदाशिव पेठ, कोथरूड, भूगाव अशा विविध भागात लहान व मोठ्या वयोगटातील मुलांचे अभिनय प्रशिक्षण शिबीरे घेण्यात आली.
या शिबीराच्या समारोपात “जंगली बाणा”, “निंज्या टाॅम-डोरेमाॅन-भीम”, “हॅपी बर्थ डे टू यू” अशा बाल नाटिकांचे प्रयोग भरत नाट्य मंदिर, बालगंधर्व, टिळक स्मारक, यशवंतराव चव्हाण आणि आण्णाभाऊ साठे सभागृह अशा पुण्यातील विविध नाट्यगृहांमध्ये सादर करण्यात आली.
ईटुकल्या पिटुकल्यांच्या नाटुकल्यांनी उपस्थित बालगोपाळांचे धमाल मनोरंजन केले. ही गंमतशीर बालनाट्ये दाखवण्यासाठी आपल्या छोट्या सेनेला घेऊन खास उपस्थित राहीलेले पालकही आपले वय विसरून या हास्यकल्लोळात बुडून गेलेले दिसले.