जीवनपट
धारातीर्थी पडला राजा
हा डाव राहिला अधुरा
सरसावली आता राणी
घेण्या खांद्यावरती धुरा…
राजावाचून राज्य राखू
उभी पटावरती थाटात
दिली उडवून खळबळ
प्रतिस्पर्ध्यांच्या गोटात..
आव नव्हता फुकाचा
दाखवी करारी बाणा
मदार ठेवे सैन्यावरती
ह्रदयात स्मरला राणा…
चाल तिरकस उंटाची
आखली चतुर निती
प्यादे सरकवी रक्षणा
नच बाळगता भिती…
सरळमार्गी धीमी गती
आडवे उभे हत्ती ठाम
डावे उजवे अडीच घर
घोडे फेकून साधे काम..
गाफील ठेवूनी शत्रूला
आमिष दावी कमाल
धूर्त फसव्या चालीनेच
चकवा चकवी धमाल…
कधी समंजस बचाव
ना मानी न कदापी हार
कधी त्वेषाने आक्रमण
कडे भेदून घुसे आरपार..
घेवू द्या परीक्षा नियती
ठाण मांडले पटावरती
राज्य राखण्या सुरक्षित
देईन “चेक” हुकमी अंती…..
वर्षा मोटे पंडित
छत्रपती संभाजी नगर
===========