गुलमोहर
जन्मजात बहरण्याचे
दान तुझ्या रे झोळीत
म्हणून तर तू फुलतोस
तप्त ग्रीष्माचा झळीत… //
सारी सृष्टी होरपळताना
तुझा सहवास मंतरलेला
तू येथे लाल केशरी सडा
पथिकासाठी अंथरलेला.. //
इवला इवलासा पर्णसाज
असे वर्षाऋतूत हिरवागार
डोळ्याचे पारणे फेडणारा
ग्रीष्मकाळी लालगर्द शृंगार.. //
हमरस्त्यावर दोहो बाजूस
तू बांधलेस केशरी तोरण
कळत नाही या निसर्गाचे
कसे असावे अद्भूत धोरण… //
तू असा बहुगुणी गुलमोहर
या तनामनाला सुखावतोस
परिस्थितीवर मात करताना
हसत जगायला शिकवतोस… //
असह्य वेदनांचा आगडोंब
तू कसा लपवतोस देहात
आंम्ही माणसे मात्र हरतो
या दुःखासोबतच्या तहात… //
विष्णू संकपाळ
बजाजनगर औरंगाबाद
=========